Afmælisveisla með góðum súkkulaðikökum

Steingrímur vaknaði kl. 6 og borðaði að venju vel af hafragraut með eplamauki í morgunmat. Hann var svo á töltinu og á mottunni sinni fram að hádegismatnum. Hann var mjög ánægður með brauðsneiðar með skinku og osti, grilluðum í samlokugrilli. Svo skruppum við í Laugardalshöll þar sem ég var að raða stólum fyrir Dalai Lama fyrirlesturinn á þriðjudaginn. Steingrími fannst þetta fljótt leiðinlegt svo við stoppuðum ekki lengi. Við skruppum svo í bíltúr með Svanhildi. Svo var farið í Kópavoginn í afmælisveislu hjá Sif vinkonu. Steingrímur var afar ánægður með súkkulaðikökurnar sem voru í boði, hann borðaði 3 sneiðar!! Súkkulaðið hafði nú ekki örvandi áhrif því hann tölti inn í hjónaherbergið og steinsofnaði við hliðina á rúminu. Eftir smá blund var hann vakinn en þurfti smá tíma til að jafna sig og lá þá uppi í rúmi með Örnu og Freydísi sem voru að horfa á sjónvarpið. Við fórum svo heim og elduðum pylsur í kvöldmatinn. Herrann borðaði heila pylsu þrátt fyrir allt súkkulaðikökuátið! Hann var svo á töltinu þar til rúmlega hálf níu. Þá lagði ég krúttið í rúmið og hann sofnaði fljótlega vært hjá bangsanum sínum.